 |
|
|
 |
Масали шайтон бар дари раҳмон«Ҳошалиллаҳ, айша шоаллоҳу кон»
Ҳоким омад дар макону ломакон.
Ҳеч кас дар мулки ӯ бе амри ӯ
Дарнаяфзояд сари як тои мӯ.
Мулк мулки ӯст, фармон они ӯ,
Камтарин саг бар дар он шайтони ӯ.
Туркмонро гар саге бошад ба дар,
Бар дараш бинҳода бошад рӯву сар.
Кӯдакони хона думмаш мекашанд,
Бошад андар дасти тифлон хорманд.
Боз агар бегонае маъбар кунад,
Ҳамла бар вай ҳамчу шери нар кунад.
Ки «ашиддоъу ала-л-куффор» шуд,
Бо валӣ гул, бо адӯ чун хор шуд.
З-оби тутмоҷе, ки додаш туркмон,
Ончунон вофӣ шудасту посбон.
Пас, саги шайтон, ки Ҳақ ҳасташ кунад,
Андар ӯ сад фикрату ҳилат танад.
Обрӯҳоро ғизои ӯ кунад,
То барад ӯ обрӯйи неку бад.
Оби тутмоҷ аст оби рӯйи ом,
Ки саги шайтон аз ӯ ёбад таъом.
Бар дари хиргоҳи қудрат ҷони ӯ
Чун набошад ҳукмро қурбон? Бигӯ.
Галла-галла аз муриду аз марид,
Чун саги босит «зироъа би-л-васид».
Бар дари Каҳфи улуҳийят чу саг
Зарра-зарра амрҷӯ, барҷастараг.
Эй саги дев, имтиҳон мекун, ки то
Чун дар ин раҳ мениҳанд ин халқ по?
Ҳамла мекун, манъ мекун, менигар,
То ки бошад мода андар сидқу нар.
Пас «аъуз» аз баҳри чӣ бошад чу саг,
Гашта бошад аз тараффӯъ тезтаг?
Ин «аъуз» он аст, к-эй турки Хито!
Бонг барзан бар сагат, раҳ баргушо.
То биёям бар дари хиргоҳи ту,
Ҳоҷате хоҳам зи ҷуду ҷоҳи ту».
Чунки турк аз сатвати саг оҷиз аст,
Ин «аъуз»-у ин фиғон ноҷоиз аст.
Турк ҳам гӯяд: «Аъуз» аз саг, ки ман
Ҳам зи саг дармондаам андар ватан.
Ту намеёрӣ бар ин дар омадан,
Ман намеёрам зи дар берун шудан».
Хок акнун бар сари турку қунуқ,
Ки яке саг ҳар дуро бандад унуқ.
Ҳошалиллаҳ, турк бонге барзанад,
Саг чӣ бошад? Шери нар хун қай кунад.
Эй ки худро шери Яздон хондаӣ,
Солҳо шуд бо саге дармондаӣ.
Чун кунад ин саг барои ту шикор?
Чун шикори саг шудастӣ ошкор.
128/177
|
|
|
|
|
|
|
|
 |
|
