* * *

Чӣ кунам, расми рӯзгорон аст,
Ишқ тақдири сарбадорон аст.

Навбати ман гузашт аз дунё,
Навбати ту висоли ёрон аст.

Қисмати ман ҳазор қисмат шуд,
Қисмати ту чу обшорон аст.

Ҳаққи ман сӯхт бо дилу ҷигарам,
Ҳаққи ту дар дили ҳазорон аст.

Дасти ман аз насиба кӯтаҳ шуд,
Дасти ту майкаши нигорон аст.

Дили ман шеваи тапиш гум кард,
Дили ту мисли навбаҳорон аст.

Бар сари ман хазони поизон,
Бар сари ту шукуфаборон аст.