* * *

То дилфурӯз омад ишқи дубораи мо,
Дар осмон дурахшид аз нав ситораи мо.

Рамзошнои ишқем он қадр, к-аз сари сӯз
Дил метапад шабу рӯз аз як ишораи мо.

Он қадр дилпарастӣ кардем, то бидидем
Мо пора-пораи дил, дил пора-пораи мо.

Мо ошиқему ошиқ, бо ишқи дардҳояш
Ҷунбондаанд гӯӣ бас гоҳвораи мо.

Бигзор пур шавад шаҳр, ин шаҳри хоколуд
Аз розҳои пинҳон ё ошкораи мо.

Холӣ мабод, эй кош, аз сӯзиши худодод
Дилҳои пурмуҳаббат ё пуршарораи мо.